透早起身，靜坐四个字久，然後體目睇世界。
這個熟悉又陌生个世界。
行去外口食个腸粉，路上幾個阿叔阿嬸行來行去，有儂正去上街，有儂上街正轉來。
行入腸粉舖，用粵語呾：「蛋肉」。
隔無若久，腸粉到桌。
腸粉入口，正知味素已變。
是老闆个手藝陽過之後 bái 噢，還是我陽過之後味覺遲鈍噢，做呢全世界个腸粉攏變味噢？公司食堂如是，外口舖頭也如是。
食直，行去叫車。昨日預約了駕車，着要準時來去。
叫車到了舖頭，睇了睇，挲了挲，還去外口試了試，轉了兩圈。
前進、轉彎兼倒退車，發現教練教我个差唔多還倒轉去了。
轉回舖頭，詖了詖，探了探，價錢談未合。
走。
叫車去公園，司機是个阿叔，伊開个車正是我頭先駛个車。佮阿叔詖了詖。
阿叔只車掠了九年，長期用來開滴滴，一年修理四五次，大概兩次是大修。伊呾無論乜个車，開一久毛病哩來。
駛了一頃，伊呾公園有㩼个門，汝要去底个？我呾我要去覓食。阿叔覺得也肚枵，呾：許地方無乜个食个，不如齊一來去食，食了正載汝去公園。
我呾：好啊。
伊開到了一處寫着「蒸飯」个餐飲舖。个舖面頭前條路酷寬，車攏泊在路中央。
我點了个排骨拼臘腸，伊點了个雞肉拼排骨。食時，伊呾伊經常來這地方食，主要是價格便，肉又㩼。
我問阿叔呾：汝覺得恁先時趁錢易，還是現在趁錢易。阿叔呾是先時。以先，伊在美的工廠上班，夠月有兩千銀工資，後來跳槽到另一個工廠，因爲許畔夠月有三千銀。 現在住在容桂，開滴滴維生。
又借問阿叔家裏陽未。阿叔呾全陽了。同一日，伊低燒家己隔離在舖頭，伊阿老高燒隔離在厝內。隔無若久，通家儂還是全陽了。問呾現在个情況，伊呾伊還會咳嗽。我呾我也是，低燒過後通常會咳嗽，高燒个卻 bũe。
食了飽，上了車，去到公園獵了獵。
人親像蚼蟻樣。
門前有一攤猜燈謎活動，我揀了兩個簡單明顯个字謎：一個是「子牙碰見老婆婆」，一個是「兩個淘氣老婆婆」，攏是猜順德美食，易易。
行入裏底，爬上青雲塔（以先叫神步塔），又隨意行了一陣，呼吸了一陣新鮮空氣。
出門，行到面頭前叫車。
司機來載。開門睇架車，邋邋遢遢，車椅還用个烏橐罩緊。一上車，伊就用普通話呵咾我「醒目」，會知來這地方等車。我呾我知許地方堵車，正行來這廣場叫車。
到了位處，又是試開了兩圈，然後談價錢。價錢非常接近了，但還未合。
走了。
叫車來轉厝，遇着个阿叔。我呾架車睇起來 bũe-mó，底當時買个，買若錢。伊呾 tsûn-年買个，要十二萬，這陣買哩免囉。
定位是在前門，無想到阿叔開到了後門。我叫阿叔：停停停，免再開入了，我在這地方落。隨後勸說伊呾：頭頂路難開，掉頭出去較易。
後門生果舖柑賣十个銀三斤，我順帶買了三斤，再轉入。
入厝，食兩三粒柑，煮兩三碗粥，佮兩三个儂聊天，睇一部斯皮爾伯格个老電影《虎克船長》。
睇半截，寫了這篇記錄。